Andijon davlat universiteti (ADU) 1931-yilda Fargʻona davlat pedagogika instituti qoshida Andijon kechki pedagogika instituti sifatida tashkil etilgan. Aynan shu institut negizida 1992-yilda Andijon davlat universitetiga asos solindi.
Hozirgi kunda oliygohda 20 mingdan ortiq talaba 29 ta taʼlim yoʻnalishida tahsil olmoqda. Universitetda 40 ta fan doktori va 198 ta fan nomzodi talabalarga taʼlim bermoqda. Universitetning Oʻzbekistondagi reytingi 30-oʻrinda. Uning qoshida Andijon davlat universiteti akademik litseyi, Shahrixon hamda Izboskan agrosanoat texnikumi va Xonobod sanoat texnikumi faoliyat koʻrsatmoqda. Oliygoh jahonning koʻzga koʻringan 40 dan ortiq oliy taʼlim muassasalari bilan hamkorlik shartnomasiga ega. Bular jumlasiga London metropoliten universiteti, Norvich universiteti (Buyuk Britaniya), Sankt-Peterburg politexnika universiteti (Rossiya), Piza universiteti (Italiya), Leypsig universiteti (Germaniya) va Jungbu (Janubiy Koreya) universitetlarini kiritish mumkin. 2012-yilda Andijon davlat universiteti Tempus dasturining grant sovrindoriga aylandi. Hozirgi kunda universitetda 3 ta xalqaro tashkilotning 5 ta loyihasi amalga oshirilmoqda.