Namangan davlat universiteti 1942-yilda pedagogika bilim yurti sifatida tashkil etilgan.
Bugungi kunda universitetda 16 ta fakultet mavjud boʻlib, 67 ta taʼlim yoʻnalishida 16 000 dan ortiq talaba tahsil olmoqda. Ularga 714 nafar professor-oʻqituvchilar, jumladan, 21 ta fan doktori va professorlar, 211 ta fan nomzodlari taʼlim bermoqda. Oliy oʻquv dargohi axbort-resurs markazi, 100 oʻringa moʻljallangan ochiq fondli oʻquv zali, virtual laboratoriya hamda multimedia markazi bilan taʼminlangan. Namangan davlat universiteti 25 ta xalqaro oliy taʼlim muassasalari bilan hamkorlik shartnomasini imzolagan. Ular qatorida Janubiy Koreyaning Gachon, Sujeong, Incheon universitetlari, Germaniyaning Drezden texnika va iqtisodiyot hamda Mainz universiteti, shuningdek, Polsha, Rossiya, Xitoy, Belorussiya, Qirgʻiziston, Italiya, Gollandiya kabi mamalakatlarda joylashgan universitetlarni koʻrish mumkin. Oliygoh Rossiya davlat pedagogika universiteti hamda Ural davlat meditsina universiteti bilan hamkorlikda qoʻshma taʼlim dasturi boʻyicha bakalavrlar tayyorlab kelmoqda. Bundan tashqari, Namangan davlat universiteti Jahon banki bilan “Baliqchilik boʻyicha ilmiy-oʻquv trenajyor yaratish”, Erasmus+ doirasidagi 4 dastur boʻyicha xalqaro loyihalarni amalga oshirmoqda. Xusuan, Erasmus+ ning KA–107 yoʻnalishi boʻyicha gʻolib boʻlgan talabalar 5 oy muddatga Italiyaning Sannio universitetiga joʻnatiladi. Namangan davlat universiteti qoshida Isʼhoqxon Ibrat nomidagi internat hamda Namangan davlat universiteti akademik litseyi faoliyat koʻrsatmoqda.