Pedagog kadrlar tayyorlashga ixtisoslashgan Navoiy davlat pedagogika institutiga 1992-yilda Toshkent pedagogika instituti Navoiy filliali (1983) negizida asos solingan. Oliygohning 27 ta taʼlim yoʻnalishida 10 000 dan ortiq talaba tahsil olmoqda. Ularga 453 nafar professor-oʻqituvchilar, jumladan, 9 nafar fan doktori, 96 nafar fan nomzodi taʼlim bermoqda. Zamonaviy oʻquv texnologiyalari bilan jihozlangan 10 dan ortiq laboratoriya, 20 ta kompyuter sinfi, 32 ta mashgʻulot xonasi va 100 000 dan ortiq kitobga ega boʻlgan kutubxona mavjud. Oʻtgan vaqt davomida oliygoh Rossiyaning Astraxan hamda Tver, Belorussiyaning Polotsk, shuningdek, bir qancha xorijiy oliy taʼlim muassasalari bilan hamkorlik shartnomasini imzoladi. Navoiy davlat pedagogika instituti qoshida akademik litsey faoliyat yuritadi.