Respublikaning yetakchi universitetlardan biri — Oʻzbekiston Milliy universiteti (OʻzMU) 1918-yilda Turkiston xalq universiteti nomi bilan tashkil etilgan. 2000-yil 28-yanvarda universitetga “Milliy universitet” maqomi hamda “Mirzo Ulugʻbek” nomi berildi.

Hozirgi kunda muassasada 78 ta taʼlim yoʻnalishi mavjud boʻlib, talabalar oʻzbek hamda rus tillarida taʼlim olishi mumkin. Universitet qoshida 2-son akademik litseyi ham faoliyat yuritadi. Oʻzbekiston Milliy universiteti 32 ta rivojlangan davlatlarning 100 dan ortiq oliy taʼlim va ilmiy muassasalari bilan hamkorlik qiladi. Moskva davlat universiteti, Seul Milliy universiteti, Kaliforniya davlat universiteti shular jumlasidandir. Universitet atoqli olimlaridan 23 nafari Oʻzbekiston Fanlar akademiyasi prezidenti va vitse-prezidenti etib saylangan. Bugungi kunda Milliy universitetda 29 nafar akademik, 150 dan ortiq fan doktori va professori, 400 dan ziyod fan nomzodi, falsafa doktori va dotsentlar faoliyat koʻrsatmoqda. Shuningdek, 200 dan ortiq yosh olim va 500 dan ziyod iqtidorli talaba ilmiy tadqiqotlar olib bormoqda. Shu bilan birga, universitet respublika miqyosida 2-oʻrinda, dunyo boʻyicha top-5000 universitetdan biri sifatida eʼtirof etilgan. Oliygoh axborot-resurs markazi zamonaviy texnologiyalar bilan jihozlangan va internet tizimiga ulangan boʻlib, kutubxona fondi 4 millionga yaqin adabiyotga ega. Oliy Majlis Senati Raisi Tanzila Norboyeva aynan shu oliygohning iqtisodchi mutaxassisligini tamomlagan.